Afartan kun oo ciidanka Israa’iil ah ayaa ku duulay Gaza, waxayna qaadday weerarkii cirka ugu ba’naa taariikhda dhow ee la xasuusto.
Waxay duqaysay 12 kun goobood oo masjid, isbitaal, iskool, Jaamacad, guryo, iyo goobo ganacsi isugu jira. Waxay Hay’adda Euro-Med Human Rights Monitor sheegtay in Israa’iil ay 25 kun oo tan oo qaraxyo ku riday Gaza, kuwaasoo u dhigma labo qunbiliyad (two nuclear bombs).
Laba milyan iyo bar ruux ayaa ka qaxay guryahooda, in ka badan 18,000 oo rayid ah oo 6,000 ay carruur tahay iyo 5,000 oo haween ayaa lagu dilay weerarradaas, halka ay Israa’iil jartay korontadii, biyihii, isgaarsiintii iyo cuntadii. Waa olole fal ciqaab wadareed ah oo ka dhan ah shacabka Falastiin.
Istiraatiijiyadda ciqaab wadareedka horay ayey dunida u soo martay oo dagaalkii labaad ee dunida ayaa duqaymo aan loo meel dayin lagu garaacay magaalooyinka Hamburg oo lagu dilay 40 kun, Darmstadt oo 12 kun ku dhimatay iyo Dresden oo 25 lagu dilay.
Ku dhowaad 58 magaalo iyo degmooyin ayaa la duqeeyey, u jeedkana wuxuu ahaa in Jarmalku is dhiibo, shacabkooda la niyad jebiyo, kuna kacaan Hitler, balse waxay ka qaadeen adkaysi, isku duubnaan iyo taageero aan hagar lahayn oo ay ku daafacdeen gobonimadooda, sharaftooda iyo dadnimadooda.
Intii uu socday dagaalkii Kuuriya, Maraykanku wuxuu burburiyey 90% korontadii Waqooyiga Kuuriya, Vietnam, wuxuu dhulka dhigay Waqooyiga Vietnam, dagaalkii koowaad ee Ciraaq 90% wuxuu burburiyay korontadii Ciraaq, haddana kiisaskaas midkoodna dadku kuma kicin dawladahooda.
Mar hadddii Maanta 193 dawladood ee Qaramada Midoobay ay ka codeeyaan Israa’iil, marka laga reebo 10 uu Maraykanku ku jiro, Madaxweynihii Maraykanka uu qiro in Israa’iil ay taageerada caalamka luminayso oo isaga iyo Netanyahu ay ka dhex tafantahay.
