Heerarka soo galootiga Sweden ayaa aad hoos u dhacay tan iyo markii ay dhacday qalalaasaha qaxootiga ku dhawaad toddobo sano ka hor, balse weli socdaalka ayaa sare u kacaya marka loo eego dhinaca taariikhiga ah, sida lagu sheegay warbixin uu qoray wargeyska Dagens Nyheter ee Sweden ka soo baxa.
Warbixintu waxay su’aal ka keenaysaa: Sweden miyay qaabishay soo galooti ka badan kuwa dalalka deriska la ah?
Sannadkii hore, 90,600 oo qof ayaa u soo haajiray Sweden, taasoo hoos u dhac weyni ku timid marka la barbar dhigo sannadkii 2016-ka markaasoo Sweden ay qaabileen 163,000 oo qof.
Laakiin marka laga eego dhinaca taariikhiga ah, heerka socdaalku wali wuu sarreeyaa, in kasta oo la adkeeyay siyaasadda socdaalka iyo xannibaadaha safarka ee masiibada Corona.
Socdaalka Sweden 1875-2021
Qofka waxaa loo aqoonsan yahay soo galooti keliya marka uu helo sharciga degenaanshaha oo uu ka diiwaangashan yahay Iswiidhan. Si kastaba ha ahaatee, tani ma khusayso dadka ka yimid wadamada EU , Norway, Iceland iyo Liechtenstein, kuwaas oo laga dhaafo nidaamka degenaanshaha oo ay isku qori karaan si xor ah, markaas oo loo arko inay yihiin soo galooti toos ah.
Tirakoob la sameeyay ayaa lagu sheegay in ku dhawaad kala bar dadka soo galootiga ah ee soo galay Sweden sanadkii hore ay ka kala yimaadeen Midowga Yurub, Norway, Iceland iyo Liechtenstein. Inta soo hartay waxay u badan yihiin qaxooti ama qaraabada soogalootiga.
Magangalyada Iswiidhan aad buu hoos ugu dhacay ka dib qalalaasaha qaxootiga 2015-2016. Madama Sweden ay ka mid ahayd dalalka qaabila qaxootiga ugu badan ee Midowga Yurub.
Ogolaanshaha deggenaanshada ku meel gaarka ah ee saddex sano ah ayaa sidoo kale noqday sharci weyn inta badan magangalyo-doonka, inkastoo markii hore sharciyo magangalyo oo rasmi ah ay ahaayeen kuwa ugu badan. Intaa waxaa dheer, suurtagalnimada isu keenidda qoyska ayaa noqotay mid xaddidan. Isla markaana, Midowga Yurub wuxuu Turkiga la galay heshiis lagu xaddidayo qulqulka qaxootiga.
Faafida Corona ayaa sidoo kale saameysay socdaalka dalal badan sababo dhowr ah oo ay ka mid yihiin xannibaadaha safarka iyo bandowyada.
Intii u dhaxaysay 2016-2019 tirada dadka soo galootiga ah ee Sweden heshay way ka badnaayeen dalalka dariska ah, laakiin tirada waxay la mid ahayd 2020.
