STOCKHOLM – Hay’adda Caymiska Bulshada ee Sweden (Försäkringskassan) ayaa ku amartay haweeney deggenayd degmada Täby ee waqooyiga Stockholm inay dib u bixiso lacag ka badan 1.3 milyan oo karoon, kaddib markii la ogaaday inay heshay gunnooyin iyo kaalmooyin aanay xaq u lahayn.

Sida ku cad go’aanka hay’adda, haweeneyda waxaa laga doonayaa inay dib u celiso 1,323,286 karoon, lacagtaas oo ay heshay sannado badan iyadoo qaadanaysay lacagaha carruurta, gunnooyinka fasaxa waalidnimada iyo taageerooyin kale.

Warbaahinta Mitt i ayaa sheegtay in haweeneyda iyo qoyskeedu ay ka guureen Sweden sannadkii 2019, balse ay weli sii wadeen helitaanka lacagahaas.

Hay’adda Försäkringskassan ayaa sheegtay in markii qoysku ka guuray Sweden ay dhammaatay xaqii ay u lahaayeen gunnooyinkan, taasoo sababtay in hadda laga dalbado haweeneyda inay dib u soo celiso dhammaan lacagihii si khaldan loo siiyay