Baarlamaanka Iswiidhan ayaa ansixiyay sharci cusub oo meesha ka saaraya waddadii lagu heli jiray deggenaanshaha joogtada ah (permanent residence) ee qaxootiga iyo dadka helay ilaalinta caalamiga ah. Sida uu dhigayo sharciga cusub, oggolaanshaha deggenaanshaha ku-meelgaarka ah ayaa noqonaya habka caadiga ah ee loo siinayo dadka ay quseyso.

Go’aankan ayaa ka mid ah isbeddellada ugu waaweyn ee ay dowladda soo bandhigtay iyadoo taageero ka helaysa xisbiga Sweden Democrats (SD), qaybna ka ah siyaasadda cusub ee socdaalka dalka.

Sharciga waxaa taageeray 301 xildhibaan, halka 42 ay ka soo horjeesteen, lix kalena ay ka maqnaayeen codbixinta. Xisbiyada Social Democrats iyo Center Party ayaa taageeray mashruuca xulafada Tidö, halka Green Party iyo Left Party ay si adag uga hor yimaadeen.

Muranka Ku Saabsan Kaalmada Sharciyeed

Afarta xisbi ee mucaaradka ayaa isku raacay inay ka hor yimaadaan qodob dowladda u oggolaanaya in la yareeyo xuquuqda dadka magangelyo doonka ah u leeyihiin qareen dowladeed oo lacag la’aan ah inta lagu jiro baaritaanka ay sameyso Hay’adda Socdaalka.

Si kastaba ha ahaatee, qodobkan ayaa lagu ansixiyay hal cod oo keliya, iyadoo 172 xildhibaan ay taageereen halka 171 ay diideen.

Goorma Ayuu Dhaqan Gelayaa?

Isbeddelladan sharci ayaa la filayaa inay dhaqan galaan 12-ka Luulyo 2026, iyadoo la raacayo qaar ka mid ah xeerarka ku-meelgaarka ah. Sharciyada cusub waxay khuseyn doonaan kiisaska go’aankooda la gaaro kadib taariikhdaas, mana saameynayaan dadka horey u haystay deggenaansho joogto ah.

Yaa Saameynaya Sharciga Cusub?

Sharcigu wuxuu khuseeyaa:

Qaxootiga.

Dadka helay ilaalin beddel ah (subsidiary protection).

Dadka lagu dejiyay Iswiidhan iyada oo loo marayo barnaamijyada dib-u-dejinta qaxootiga (quota refugees).

Kooxahan dambe ma heli doonaan deggenaansho joogto ah, iyadoo rukhsadaha ku-meelgaarka ahi ay noqonayaan nidaamka caadiga ah.

Sidoo kale, isbeddelladu waxay taabanayaan:

Dadka helay deggenaansho sababo bini’aadantinimo oo gaar ah.

Kiisaska aan lagu fulin karin masaafurin sababo la xiriira caqabado jira.

Qaar ka mid ah kiisaska mideynta qoysaska.

Dadka leh xaaladda “degane muddada dheer ee Midowga Yurub” iyo xubnaha qoysaskooda.

Dib Loo Dhigay Go’aanka Ku Saabsan Ka Qaadista Deggenaanshaha Joogtada ah

Xisbiyada Tidö ayaa dib u dhigay qorshe kale oo la xiriira ka qaadista deggenaanshaha joogtada ah ee qaar ka mid ah dadka haysta, waxaana la filayaa in arrintaas dib loogu laabto doorashooyinka soo socda kadib.

Qorshahan ayaa dhaliyay dhaleeceyn uga timid xisbiyo siyaasadeed, ururro xuquuqda aadanaha ah iyo hay’ado rasmi ah. Sida ku cad qiimeyn dowladeed, haddii mustaqbalka la hirgeliyo, waxaa saameyn kara inta u dhaxaysa 98,000 ilaa 185,000 qof, kuwaas oo badankoodu deggenaansho joogto ah ku helay magangelyo ama sababo bini’aadantinimo.