Stockholm: Baarlamaanka Sweden ayaa ansixiyay soo jeedimo ay dowladda iyo Xisbiga Dimuqraadiga Sweden ku doonayaan in lagu adkeeyo shuruudaha mideynta qoysaska (familjeåterförening).

Labada codbixin ee baarlamaanka ayaa ku dhammaaday 176 cod oo oggol ah iyo 171 cod oo diidmo ah. Xeerarka cusub ayaa dhaqan geli doona 1-da Oktoobar 2026.

Laba sano oo sugitaan ah

Mid ka mid ah isbeddellada ugu waaweyn ayaa dhigaya in qofka haysta ogolaanshaha deggenaanshaha ku-meelgaarka ah uu sugo ugu yaraan laba sano ka hor inta xubnaha qoyskiisa loo oggolaan karo ogolaansho deggenaansho oo ku saleysan mideynta qoyska.

Shuruudda dhaqaale ee masruufka oo la adkeeyay

Isbeddelka labaad ayaa khuseeya shuruudda masruufka dhaqaale. Dowladda ayaa hubin doonta in shuruuddan la buuxiyay mar kasta oo la cusboonaysiinayo ogolaanshaha deggenaanshaha ku-meelgaarka ah.

Tani waxay saameyn ku yeelan kartaa xubnaha qoyska ee ogolaanshahooda deggenaansho uu ku xiran yahay qofka ay xiriirka qoyska ku saleysan yihiin.

Xisbiyada mucaaradka ayaa horay ugu heshiiyay inay si wadajir ah uga hor yimaadaan labada soo jeedin ee ugu muhiimsan, balse dowladda ayaa ugu dambeyn ku guuleysatay codbixinta, iyadoo heshay 176 cod halka 171 ay kasoo horjeesteen.

Isbeddelka ku saabsan dhalinyarada la tarxiilo

Sharciga cusub wuxuu sidoo kale wax ka qabanayaa waxa loo yaqaan kiisaska tarxiilka dhalinyarada.

Sida ku cad isbeddelka, qof ka yar 21 sano, oo markii uu ilmo ahaa helay ogolaansho deggenaansho sababo la xiriira xiriirka qoyska, kadibna gaaray 18 sano, ayaa fursad u heli kara inuu helo ogolaansho deggenaansho.

Dhammaan xeerarkan cusub ayaa la qorsheeyay inay dhaqan galaan 1-da Oktoobar 2026.