Ciidamada Ruushka ayaa Gantaallo ku garaacay Magaalooyin badan oo ku yaalla Dalka Ukrain, waxana ay Ciidankooda kasoo galeen Xeebta Koonfureed ee dalkaasi sida ay sheegeen Saraakiil iyo Warbaahintu, ka dib markii Madaxweyne Vladimir Putin uu fasaxay waxa uu ugu yeedhay Hawl-gal Ciidan oo gaar ah oo laga fuliyo Bariga.
Wax yar ka dib markii uu Putin ka hadlay khudbad laga sii daayay TV-ga qaranka Ruushka, ayaa waxaa laga maqlayay qaraxyo ka hor waaberigii dhanka caasimadda Ukraine ee Kyiv.
Rasaas ayaa ka dhaceysa meel u dhow garoonka diyaaradaha ee caasimadda, sida ay sheegtay wakaaladda wararka ee Interfax, waxaana magaalada laga maqlayay seeriyaal.
Putin waxa uu hadda bilaabay duulaan buuxa oo uu ku qaaday Ukraine,magaalooyinka nabdoon ee Ukraine waxa ku socda shaqo joojin”ayuu yidhi Wasiirka Arrimaha Dibada ee Ukraine Dmytro Kuleba oo bartiisa Twitterka soo dhigay.
“Kani waa dagaal gardaro ah, Ukraine way is difaaci doontaa wayna guulaysan doontaa, dunidu way joojin kartaa Putin waana in la joojiyaa.”
Madaxweynaha Mareykanka Joe Biden, oo ka falcelinayay duulaan uu Mareykanka saadaaliyay toddobaadyo, ayaa sheegay in ducadiisu ay la jirto shacabka Ukraine “maadaama ay la kulmayaan weerar aan sabab lahayn oo aan cudur daar ahayn oo ay geysteen ciidamada militariga Ruushka”.
Ruushka ayaa dalbaday in la joojiyo balaadhinta dhanka bari ee NATO, Putin waxa uu ku celiyay mawqifkiisii ahaa in aan la aqbali karin xubinnimada Ukraine ee isbahaysiga millatari ee Atlanta ee uu Maraykanku hoggaamiyo.
Waxa uu sheegay in uu fasaxay tilaabo milatari kadib markii Ruushku uu waayay wax kale oo aan ahayn in uu iska difaaco waxa uu ku sheegay khataraha ka imanaya Ukraine casriga ah, oo ah dal dimuqraadi ah oo ay ku nool yihiin 44 milyan oo qof.
