Heerka shaqo la’aanta ee Sweden ayaa bishii Agoosto gaaray 8.7%, taas oo ka dhigtay dalka saddexaad ee ugu sarreeya heerka shaqo la’aanta ee Midowga Yurub.
Xogta ay soo saartay Eurostat ayaa muujisay in Finland iyo Spain oo keliya ay lahaayeen heerar ka sarreeya Sweden. Finland ayaa diiwaangelisay 10.3%, halka Spain ay gaartay 10.0%.
Celceliska shaqo la’aanta ee Midowga Yurub wuxuu ahaa 6.1%, halka aagga euro-da uu ahaa 6.4%, waxaana heerka aagga euro-da uusan waxba iska beddelin marka loo eego xogtii hore. Tiradaasi waxay sidoo kale waafaqday celceliskii ay saadaaliyeen falanqeeyayaasha, sida ay sheegtay Bloomberg.
Inkasta oo heerka shaqo la’aanta Sweden uu weli sarreeyo marka loo eego dalal badan oo Midowga Yurub ah, haddana xog cusub ayaa muujinaysa in xaaladda suuqa shaqadu ay ka soo raynayso marka loo eego sannadkii hore.
Sida laga soo xigtay Trygghetsfonden TSL, ku dhowaad 2,350 qof ayaa rubucii saddexaad helay taageero loogu talagalay inay shaqo cusub helaan. Tiradani waxay ahayd 33% ka yar tiradii isla muddadaas ee 2025, waxayna ahayd tiradii ugu hoosaysay ee rubuca saddexaad laga diiwaangeliyo tan iyo 2022.
Xogtu waxay sidoo kale muujisay in 88%, ama ku dhowaad 9 qof 10-kii qof, ay heleen shaqo cusub kaddib markii ay dhammaatay muddadii ay taageerada dib-u-shaqaalaysiinta ka heli jireen sanduuqa.
