Maxkamadda Malmö ayaa nin 18-sano jir ah ku heshay danbi ah in uu dil u geystay labo macalin oo wax ka dhiga dugsiyada Latinka gugii hore, waxaana lagu xukumay xabsi daa’in.
Ardayga la xukumay oo lagu magacaabo Fabian Cederholm ayaa noqday 18-sano jirkii ugu horeeyay ee agu xukumo xabsi daa’in kadib markii sharciga ciqaabta wax laga bedelay.
Maxkamada ayaa sidoo kale xukuntay in dambiilaha uu bixiyo magdhow lacageed oo dhan hal milyan oo karoon qoysaska dhibanayaasha.
“Waa laba dil oo aad u naxariis daran oo sababay in labada dhibane ay si weyn u rafaadaan ka hor inta aan la dilin,” ayuu guddoomiyaha maxkamadda sare Johan Kvart ku yiri war-saxaafadeed. Waxa uu intaa ku daray, “Waxaa jirta xog ku saabsan kiiska in dembiilaha uu jeclaa toogashada dugsiyada, xasuuqa iyo falalka rabshadaha.”
Maqribnimadii 21-kii Maarso, wiilka dhalinyarada ah ayaa dubbe, faas iyo mindi ku weeraray labo macalin oo wax ka dhiga Iskuulka Laatiinka, taasoo keentay in la dilo markii dambe. Markii uu dembigiisii galay, isaga laftiisu wuxuu wacay booliiska oo uu u sheegay wixii uu sameeyay. Sababta uu tan u yeelayna, dembiilihii wuxuu yidhi, Maxaa yeelay, waan necbahay iyaga.
Booliska ayaa gacanta ku dhigay ninka weerarka geystay 10-daqiiqo kadib markii warbixinta laga soo sheegay dabaqa saddexaad ee iskuulka, waxaana labada macalin ay soo gaareen dhaawacyo halis ah, iyadoo dambiilaha uu kasoo baxay suuliga isagoo xiran dhar madow iyo koofiyad. Si deggan buu u dhaqmay, isaga oo magaciisii sheegay oo qiray wixii uu sameeyay.
