Stockholm – Bisha Agoosto 2026 waxaa Iswiidhan ka bilaabanaya isbeddello muhiim ah oo saameynaya siyaasadda iyo bulshada. Waxaa si rasmi ah u xoogeysanaya ololaha doorashada, iyadoo sidoo kale la filayo in baarlamaanku yeesho fadhi gaar ah oo lagu ansixinayo sharciyo muhiim ah. Intaa waxaa dheer, waxaa la qaban doonaa imtixaankii ugu horreeyay ee aqoonta bulshada ee looga baahan yahay codsadayaasha jinsiyadda Iswiidhan, halka sharciyo cusubna ay dhaqan geli doonaan.

Xisbiyada siyaasadda ayaa inta lagu jiro bisha Agoosto gelaya marxaladda ugu firfircoon ee ololahooda doorashada. Taageerayaasha xisbiyada ayaa lagu arki doonaa waddooyinka iyo fagaarayaasha iyagoo qaybinaya waraaqaha ololaha isla markaana la kulmaya codbixiyeyaasha.

Sidoo kale, hoggaamiyeyaasha xisbiyada ayaa ka qeyb geli doona doodo siyaasadeed iyo wareysiyo ay baahinayaan warbaahinta si ay u soo bandhigaan barnaamijyadooda doorashada.

Dhammaadka bisha, xisbiyadu waxay bilaabi doonaan inay ka dhistaan teendhooyin iyo xarumo olole fagaarayaasha waaweyn ee magaalooyinka kala duwan.

Sida lagu sheegay warbaahinta The Local, waxaa la filayaa in ololayaasha xisbiyadu ay sii xoojiyaan qaybinta waraaqaha iyo booqashooyinka ay ku tagayaan xaafadaha iyo goobaha dadweynaha, halka hoggaamiyeyaashuna ay kordhin doonaan ka qeybgalka doodaha iyo barnaamijyada warbaahinta.

Laga bilaabo 20-ka Agoosto, muwaadiniinta Iswiidhan ee ku nool dibadda waxay codkooda ka dhiiban karaan safaaradaha iyo qunsuliyadaha Iswiidhan.

Dhanka gudaha dalka, codbixinta hore (early voting) waxay bilaaban doontaa 26-ka Agoosto, halka dadka dibadda ku nool loo oggolaan doono inay codkooda ku diraan boostada laga bilaabo 30-ka Agoosto.