Kulan xisbiyada xubnaha ku leh baarlamanka marka laga reebo xisbiga SD ey markii afraad isugu yimaadeen, sidii meel looga soo wada jeedsan lahaa kooxaha dembiyada isku baheeysta iyo toogashooyinka dalka ku soo badanaya ey isaga baxeen xisbiyada L, M iyo KD, markii la isku af garan waayey qodobbadii ay dawladdu hor keentay kulanka sabtidii ina dhaaftay. Hase yeeshee dawladdu soo ban dhigtay 34 qodob, mar ay shir jaraa’id qabatay kulanka dabadii.

Wasiirka shuruucda Morgan Johansson (S) ayaa ka faallooday sababta ka dambeeysay inaan dawladda iyo mucaaradku ku heshiin habkii looga hor tegi lahaa dhibaatooyinka ammaanka ee dalka la soo gudboonaaday.

– Wax yar ayaa u harsanaa xisbiyada kale. Dhanka kale waxaa wanaagsanayd in la ogaado in 34-kan qodob yihiin kuwo wax looga qaban karo caqbadahaa wakhtiga dhow iyo mustaqbalkaba, waxeyna khuseeyaan howlaha la dagaalanka xoogga iyo sidoo kale howlaha caqabadaha bulshada ee aasaaska u ah kobacooda, sida uu sheegay Morgan Johansson.

34-ka qodob ayey ka mid yihiin awoodo dheeri ah oo ciidanka ammaanka la siiyey oo ey ku jiraan, in xogta kombiyuutarrada la akhrisan karo, kor u kac ballaaran ee kaamerooyinka, iyada oo la kordhiyo xuquuqda guryaha lagu baari karo iyo in lala socon karo dhaqaalaha dembiileyaasha.

Waxaa sidoo kale qodobbada ka mid ah in kor loo qaadey ciqaabta falalka hor istaaga howlaha cadaaladda iyo xoog la geliyo arrimmaha bulshada si ammaanka kor loogu qaado. Qaar badan oo qodobbadan ka mid ah ayaa horey loo hadal hayay iyadoona lafileyo inay dawladda u suurto geli doonto in qodobbadan ey sahal ku mari doonaan baarlamanka.

In xisbiyada Moderaterna, Kristdemokraterna iyo Liberalerna ku dhawaaqaan iney wada haddalladii isaga baxeen ayaan salka ku hayn fikirrada ku qoran 34-ka qodob, balse aragtidooda qodobbada ka maqan liiska dawladda. Sidan ayuu ku macneeyay af hayeenka arrimmaha shuruucda xisbiga Moderaterna, Johan Forssell sababta xisbigiisu uga baxay wada hadallada.

– Tusaale ahaan waxaan tabayaa fikirkii in la baabi’iyo xeerkii ciqaab fududeeynta ee dhallin yarada, in meesha laga saaro hoos u dhigistii ciqaabta ee dembiyada badan ee lagu noqnoqdo, ciidanka ammaanka oo loo sharciyeeyo inay xaafadaha qaarkood ciddii ey doonaan tuhun la’aan ka baari karaan hub iyo waxyaabaha qarxa iyo sidoo kale in la adkeeyo xirfadda muhiimadda ku fadhida ee ciidanka ammaanka, sida uu sheegay Johan Forssell oo u warramay, Birgitta Johansson oo ka howl gasha laanta wararka Ekot.

Xisbiyada saddexda L, M iyo KD ee qaadacay wada hadallada ayaa isku deyi doona sidii ey aqlabiyad uga raadin lahaayeen baarlamanka fikirradooda xilliga uu baarlamanku howlihiisa ku guda jiro.

– Waxaan iminka ku tallaabsan doonnaa inaannu howlhayega sii kordhinno. Annaga oo aqlabiyad ku raadineeyna sidii aannu u hir gelin laheyn siyaasad garabka midig, haddii loo baahdana aannu ku soo ban dhigno baarlamanka fikirro adadag oo wax ku ool ah si loo meel mariyo, sida uu hadalka u dhigay.

Af hayeenka siyaasadda shuruucda ee xisbiga Centerpartiet ayaa ku dhaleeceeyay xisbiyada M, KD iyo L iney wada hadalka dibadda ka istaagaan, maadaama uu xisbigu rajeeynayay in xisbiyadu ku heshiiyaan tallaabooyinka baahida loo qabo.

Xigasho/radiosverige