Booliska Iswiidhan ayaa go’aansaday in uu soo bandhigo hannaan cusub oo ku saabsan ballan-qaadka taariikhda cusboonaysiinta baasaboorka , taas oo dadka ku adkeynaysa in ay ballansanaadaan wax ka badan hal ballan.

Qofka doonaya in uu ballan qabsado waa in uu buuxiyaa sanduuq gaar ah oo ka hortagaya in nidaamka qabsiga ee goobta boos celinta onlineka uu si toos ah ballan u qabsado.

Suuq madoow ayaa dhawaan ka curtay dalka Sweden, kaas oo lacago looga qaadayo qofka balan ka doonayo qeybta Booliska ee qaabilsan Basaboorka.

Si taas looga hortago, waxaa lagama maarmaan noqotay, marka ballan la qabsanayo, in la galo magaca koowaad iyo kan dambe ee qofka codsanaya baasaboorka, si aan magaca loo beddeli karin intaa ka dib.

“Waxaan u baahanahay inaan dib u soo saarno qaab-dhismeedka dhijitaalka ah ee nidaamka otomaatiga ah ee ballansashada balamaha,” ayuu yiri Magnus Rugglert, maamulaha qaybta ee waaxda sharciga ee booliiska.

Waqtiyada sugitaanka qaadashada baasaboorka cusub ee Iswiidhan aad ayey u dheeraayeen sababtoo ah intii lagu jiray cudurka Corona, qaar badan ayaan cusboonaysiin baasaboorkooda.