Jaalliyadda Soomaalida ku nool Maraykanka ayaa argagax ka qaaday fal ay Boliska Maraykanka ku toogteen Haweeney Soomaali ah oo la oran jirey Shukri Cali Saciid oo 36-jir ahayd.
Labo Sarkaal oo ka tirsan Boliska Gobalka Georgia ayaa la sheegay inay Haweeneydaasi toogteen maalintii Sabtida ee la soo dhaafay, kadib, markii ay diiday inay iska dhigto Tooreey ay wadatay.
Hadal ka soo baxay Saldhigga  Boliska Johns Creek ee Gobalka Georgia ayaa lagu sheegay in laga soo wacay Telefoonka Gurmadka ee 911, loona sheegay inay Haweeney Toorey wadata khatar ku hayso noloshooda.
Marxuumadda la dilay ayaa la sheegay inay qabtay xanuun dhinaca Dhimirka, waxayna Boliska ku guul-daraysteen dhowr isku-day oo ay ku doonayeen inay Mindida kaga dhigaan, balse markii dambe ayey toogasho ku dhaawaceen.
Hadal ka soo baxay Boliska Dembi-baarista ayaa lagu sheegay inay Haweeneydaasi loola cararay Isbitaalka, balse ay u geeriyootay dhaawacii Toogashadaasi.
Dhinaca kale, Golaha Muslimiinta ku nool Mraaykanka iyo Soomaalida ku nool gobalka Minnesota ayaa ku baaqay in Boliska la siiyo Tababar, si ay ula macaamilaan Dhibanayaasha dhimirka ka xanuunsan.
Jaalliyadda Soomaalida ku nool dalkaasi ayaa sheegay inaysan Boliska noqon Karin Garsoore iyo Dilaa’, waxayna ugu baaqeen inay si deggan ula macaamilaan dadka ay ka shakiyaan.
