London – Boqortooyada England, Faransiiska, Isbaanishka, Jarmalka iyo dalal kale oo Yurub ah ayaa wajahaya hir kulayl oo aan caadi ahayn, kaas oo ka dhashay waxa loo yaqaan (heat dome). Mas’uuliyiinta ayaa soo saaray digniino ku saabsan khataro nafeed oo halis ah, halka tallaabooyin degdeg ah laga hirgeliyay meelo badan, oo ay ku jiraan xiritaanka dugsiyada iyo carqaladeynta adeegyada gaadiidka.

Maamulka Britain ayaa maanta oo Arbaco ah uga digay dadka ku nool qaybo badan oo dalka ah in heerkulka sare uu khatar ku noqon karo nolosha, iyadoo Heat Dome-ka ay weli dul saaran tahay galbeedka Yurub isla markaana ay keentay xaalado cimilo oo aad u daran.

Qubbadda kulaylka waa aag cadaadis sare leh oo hawada kulul ka soo xanniba Waqooyiga Afrika, taas oo sababta in kulaylku muddo dheer ku sii nagaado gobolka. Heerkulka ayaa lagu qiyaasay inuu ka sarreeyo celceliska xilligan sannadka inta u dhexeysa 10 illaa 15 darajo Celsius.

Faransiiska, dowladda ayaa sheegtay in kulaylkan ba’an uu si toos ah ama si dadban ugu lug lahaa dhimashooyin la diiwaangeliyay. Sidoo kale, hirkan kulaylka ayaa sababay hoos u dhac ku yimid tayada hawada iyo koror ku yimid wasakhowga ozone-ka, taas oo sii kordhisay khatarta caafimaad ee bulshada.

Britain ayaa soo saartay digniin caafimaad oo heerkeedu yahay casaan, taas oo khuseysa inta badan bartamaha iyo koonfurta England iyo sidoo kale Wales. Tani waa digniintii labaad ee ugu sarreysay ee noocan ah ee abid laga bixiyo dalka.

Digniintii ugu horreysay ee heerkan gaarta ayaa la soo saaray bishii Luulyo 2022, markaas oo heerkulku markii ugu horreysay taariikhda Britain ka sarreeyay 40 darajo Celsius.

Khubarada cimilada ayaa ka digaya in hirarka kulaylka ee sii kordhaya ay xiriir la leeyihiin isbeddelka cimilada, iyagoo ku baaqay in la qaado tallaabooyin dheeraad ah si loo ilaaliyo dadka nugul, gaar ahaan waayeelka, carruurta iyo dadka qaba xanuunnada daba-dheeraada.