Paris – Maamulka Faransiiska ayaa ku dhawaaqay in dalka laga helay kiiskii ugu horreeyay ee fayraska Ebola. Qofka cudurka qaba ayaa ah dhakhtar dhawaan ka soo laabtay hawl shaqo oo uu ka soo qabtay Jamhuuriyadda Dimuqraadiga ah ee Congo (Kinshasa).

Wasaaradda Caafimaadka Faransiiska ayaa bayaan ay baahiyeen warbaahinta dalka ku sheegtay in bukaanka lagu hayo karantiil, iyadoo la wado baaritaanno lagu ogaanayo dadka uu la kulmay si loo yareeyo khatarta faafitaanka cudurka.

Wasaaraddu waxay sidoo kale xaqiijisay in khatarta uu cudurku ugu gudbi karo bulshada inteeda kale ay hadda tahay mid hooseysa.

Dillaaca cudurka ee Congo ayaa lala xiriiriyay nooca loo yaqaan Bundibugyo ee fayraska Ebola, kaas oo aan weli loo hayn tallaal ama daawo gaar ah oo si toos ah uga hortagta.

Ebola waa cudur fayras ah oo halis ah, kaas oo sababa qandho daran, daal, madax-xanuun iyo murqo xanuun. Xaaladaha qaarkood wuxuu u gudbi karaa dhiig-bax gudaha iyo dibadda ah iyo shaqo-gab ku yimaada qaar ka mid ah xubnaha jirka.

Fayrasku wuxuu ku faafaa taabashada dhiigga ama dheecaannada jirka ee qofka cudurka qaba, ama xayawaannada sida dabiiciga ah u sida fayraska. Ebola waxaa lagu yaqaanaa inuu leeyahay heer dhimasho oo sareeya haddii aan si degdeg ah loo helin daryeel caafimaad, hase yeeshee fursadaha badbaadadu way kordhaan marka cudurka goor hore la ogaado lana helo daaweyn taageero ah.