Ra’iisul wasaaraha Sweden, Ulf Kristershon, ayaa ka hadlay hanjabaadaha cusub ee argagixisada Al-Qaacida ee dalkiisa, isaga oo tixgalinaya inay xaqiijinayaan halista xaaladda hadda jirta.

“Khatarta ugu dambeysay waxay xaqiijineysaa halista ay xaaladdu leedahay, waxayna xaqiijineysaa waxa aan ka ognahay hanjabaadaha sii kordhaya ee ka dhanka ah Sweden,” ayuu ku yiri hadal uu siiyay wargeyska Expressen.

Dhankiisa, wasiirka arrimaha dibadda Sweden Tobias Billström ayaa carabka ku adkeeyay in dalkiisa uu si dhab ah u qaato hanjabaadaha Al-Qaacida iyo kooxaha kale ee argagixisada.

“Waa inaan aad u feejigannaa, laakiin waa inaanan ka baqin,” ayuu ku yiri hadal uu siiyay Radio P4. Sababtoo ah hadafka kooxahaasi waa inay nagu beeraan cabsi, mana aha inaynu hadafkooda gaarno”.

Cilmi baare argagixisanimada Hans Brunn ayaa tilmaamay in hanjabaadaha al-Qaacida aysan xambaarsanayn wax cusub.

Waxaana uu ku tixgaliyay hadal uu siiyay wakaaladda wararka Sweden ee TT in ay tahay baaq kale oo loogu baaqayo dadka adduunka oo dhan in ay ka aargoostaan ​​Denmark iyo Sweden, oo la bar tilmaameedsado.

Dhankiisa, Magnus Ranstorp, oo ah cilmi-baare ku takhasusay arrimaha argagixisada kana tirsan Akadeemiyada Difaaca Sweden, ayaa yiri, “Khatarta Al-Qaacida ee dhawaanta waa tii ugu khatarsanayd oo faahfaahsan ee ka dhanka ahayd Sweden.”

Waxa uu u arkayay in al-Qaacida ay noqotay urur baahsan marka loo eego waayadii hore, balse ay sharciyad sare ku naaloonayso kooxaha argagixisada hoosaadka ah sida dhaqdhaqaaqa dhalinyarada Soomaaliyeed.

Waxa uu dhayalsaday khatarta ay Xisbullah ee Lubnaan ku hayso hanjabaada Sweden, isaga oo u arkayay inay tahay dacaayad.

Britain ayaa dhawaan ka digtay weeraro Argagixiso oo laga yaabo inay ka dhacaan Sweden, waxaana xigay Al-Qaacida oo soo bandhigtay hanjabaado cusub, taasoo walaac ku abuurtay Sweden.

Xigasho: omni.se