Madaxda ugu sareysa ee ka socota Turkiga, Jarmalka, iyo Midowga Yurub ayaa Talaada maanta qabtay kulan fiidiyow ah oo diiradda lagu saaray xiisaddii ugu dambeysay ee Bariga Mediterranean, sida ay sheegeen saraakiisha Turkiga.
Photo/Yenisafak
Shirka seddex geesoodka ah waxaa ka mid ahaa Madaxweynaha Turkiga Recep Tayyip Erdogan, Hogaamiyaha Jarmalka Angela Merkel, iyo Charles Michel, madaxa Golaha Yurub, sida uu sheegay Agaasinka Isgaarsiinta ee Turkiga.
Recep Tayyip Erdogan ayaa hoosta ka xariiqay sida uu ugu faraxsan yahay dadaallada dhexdhexaadinta ee Berlin, Recep Tayyip Erdogan wuxuu carrabka ku adkeeyay muhiimadda shir goboleed lagu qabanayo Bariga Mediterranean-ka oo ay ka soo qaybgalayaan dhammaan dhinacyada, oo ay ku jiraan Qubruska Turkiga, ayaa lagu yiri bayaan ay soo saartay Dowlada Turkiga.
Tallaabada Giriigga waxay muhiim u noqon doontaa sida heshiiska uu dib ugu soo nooleynayo marinnada wadahadalka, ayuu yiri Erdogan.
Waxaa sidoo kale hoosta laga xariiqay intii uu socday kulanka in Turkiga iyo Griiga ay diyaar u yihiin inay bilaabaan wadahadalada labada dhinac.
Sidoo kale waxaa ka mid ahaa kulanka heerka sare Wasiirka Arimaha Dibada Turkiga Mevlut Cavusoglu, Wasiirka Difaaca Qaranka Hulusi Akar, Madaxa Ururka Sirdoonka Qaranka (MIT) Hakan Fidan, Agaasimaha Isgaarsiinta Fahrettin Altun, afhayeenka madaxweynaha Ibrahim Kalin, iyo Madaxa Golaha Wasiirada Hasan Dogan.
Giriigga ayaa ka soo jorjeeda sahaminta tamarta ee Turkigu ka wado Bariga Mediterranean, isagoo isku dayaya inuu sheegto dhul badeedka Turkiga oo salka ku haya jasiirado yaryar oo ku dhow xeebta Turkiga.
Turkiga – oo ah waddanka leh xeebta ugu dheer ee Mediterranean – wuxuu u diray maraakiib qoditaan si ay uga baaraan kaydka tamarta ee kaydka qaaradda, iyagoo sheegay in Turkiga iyo Jamhuuriyadda Turkiga ee Waqooyiga Qubrus (TRNC) ay labaduba xuquuq ku leeyihiin gobolka.
Si loo yareeyo xiisadaha, Turkiga wuxuu ku baaqay wadahadal si loo hubiyo in si cadaalad ah loo wadaago kheyraadka.
Midowga Yurub wuxuu sidoo kale ku baaqay wadaxaajood dhexmara dhinacyada. Hoggaamiyeyaasha Midowga Yurub waxay ka wada hadli doonaan khilaafka iyo sidoo kale xiriirka ururka iyo Turkiga inta lagu guda jiro shir madaxeedkooda aan caadiga ahayn ee Brussels ka dhacaya Khamiista iyo Jimcaha.
Si loogu diyaar garoobo kulanka hogaamiyaasha, baarlamaanka Yurub wuxuu usbuucan go’aan ka soo saari doonaa mowduuca.
Turjumay Somaliska Istanbul
Source/yenisafak
Fadlan Ilaali Xaquuqda wararkeena
