Wasaaradda Arrimaha Dibadda ee Sweden ayaa soo saartay digniin ka dhan ah safarrada aan muhiimka ahayn ee loo aado Sacuudi Carabiya, kaddib go’aan la mid ah oo hore loogu dabaqay Urdun isla maanta.

Wasaaraddu waxay boggeeda internetka ku wargelisay muwaadiniinta Iswiidhan inay ka fogaadaan dhammaan safarrada aan daruuriga ahayn ee loo aado Sacuudi Carabiya, sababo la xiriira xaaladda amni ee sii xumaanaysa ee gobolka.

Horey ayay wasaaraddu uga digtay safarrada aan muhiimka ahayn ee loo aado Imaaraadka, Kuweyt, Baxreyn, Qadar iyo Urdun, kaddib weerarro ay Mareykanka iyo Israa’iil ku qaadeen Iiraan, iyo weerarro aargoosi ah oo Iiraan ku qaaday gantaallo iyo diyaarado aan duuliye lahayn (drones) oo saameeyay dalal dhowr ah oo gobolka ku yaalla.

Wasaaradda Arrimaha Dibadda ee Iswiidhan waxay isticmaashaa saddex heer oo digniino safar ah:

Heerka koowaad: Digniin ku saabsan “safarro aan muhiim ahayn”.

Heerka labaad: Digniin ka dhan ah “dhammaan safarrada”.

Heerka saddexaad: “Baaq lagu dalbanayo in dalka laga baxo”, waxaana la soo saaraa oo keliya marka ay jirto khatar weyn oo ku wajahan nolosha iyo badbaadada.

Waqtigan xaadirka ah, wasaaraddu waxay ugu baaqaysaa muwaadiniinteeda inay ka baxaan Iiraan iyo Yemen. Sidoo kale waxay ka digaysaa dhammaan safarrada loo aado Ciraaq iyo Lubnaan (marka laga reebo xaalado kooban), iyo sidoo kale Falastiin iyo Israa’iil.

Digniinaha ku saabsan “safarro aan muhiim ahayn” waxay hadda khuseeyaan Baxreyn, Imaaraadka, Qadar (marka laga reebo transit), Kuweyt, Urdun iyo Sacuudi Carabiya.