Marka aad akhrido mowduucyada ay ka qoraan saxaafada Sweden Soomaalida ayaa waxaa loo kala qeybin karaa labo qeybood. Kuwa dhinaca cunsuriyiinta ayaga warkoodu waa iska cadyahay oo Soomaalida waxaa loogu yeeraa “parasiter” ama ku dul noole. Saxaafada caadiga ah ayaa iyaguna waxay Soomaalidu inta badan ugu yeeraan “analfabeter” ama dad aan waxba qorin waxna akhrin.

Mowduuc lagu qoray wargeyska ETC ayaa qoraaga waxa uu ku baaqay in eeda la saaro bulshada Sweden ee aan si gooni ah loo saarin Soomaalida. Fashilka ayaa mowduuca lagu sheegay in uu ka yimid dhinaca bulshada Sweden oo ku guuleysan wayday in ay caawiso dadka cusub ee wadanka soo galay.

Mowduuc kale oo maalmo ka hor lagu qoray wargeyska Aftonbladet ayaa isagana mowduuc looga dhigay “Somalia visar hur fel SD har” oo ah “Somaliya ayaa muujinaysa in SD ay qaldantahay” markaan arkay ciwaanka mowduuca waxaan isdhahay sheeko macaan ayaa meesha ka socota balse markii aan hoos u akhriyay ayaa waxaaba laga hadlayaa burburka ku yimid Soomaaliya, iyagoo isbarbar dhigaya dooda SD ee ah in qowmiyadaha kala duwan ay abuuraan dhibaato, mowduuca ayaa lagu sheegay in Somalia aysan lahayn qowmiyado kala duwan balse ay 20 sano is xasuuqayeen.

Wargeysyada, idaacadaha iyo telefishinada Sweden ayaa markasta oo laga hadlayo Soomaalida waxaa la soo bandhigaa qeybaha xun ee bulshada oo keliya. Waxa laga hadlayo waa Soomaali luuqadii dhib ka haysto, kuwo la cunsuriyeeyay, kuwo shaqo raadis ah iwm. Waa yartahay inta la soo bandhigo Soomaali shaqaynaysa, kuwo ganacsiyo abuuray, kuwo waxbaranaya iyo kuwa la mid ka ah.

Sawirkaan qaabka daran ee Soomaalida laga muujinayo ayaa eediisa inta badan waxaa iska leh Somaalida. Dadkii wadanka hore u soo galay ayaa qaasatan abuuray sawir qaldan oo ku saabsan Soomalida. kuwa cusub ayaa waxaa hortaagan darbigii ay dhiseen kuwii hore, oo xitaa markii ay arkaan dad cusub oo dadaalaya ka xumaanaya sidii iyaga oo weerar lagu yahay ama horay wax wanaagsan u sameeyay.

Soomaalida ayaa kala abuuratay boqolaal jaaliyado isqilaafsan oo midba midka kale tartan kula jiro. Ma jiro urur firfircoon oo u dooda arimaha Soomaalida. Saxaafada Sweden ayaa sawirka qaldan ee Soomaalida waxay ka helaan shaqsiyaadka. Dabeecada saxaafada ayaa ah in dhinaca negativeka ay xooga saaraan balse xaqiiqada ayaa ah in Soomaalida ku nool Sweden aysan lahayn wax badan oo wanaag ah oo laga sheego. Taas in wax laga badalo waxay ku xirantahay in Soomaalidu ay isku duubnaan samayso, in dadku ay xooga saaraan isdhexgalka bulshada, ganacsiga , shaqada iyo waxbarashada.

Ugu dambeyntii waxaa jira cunsuriyad guud oo ka dhan ah Soomaalida. Mowduuca lagu qoray wargeyska ETC ayaa lagu yiri “Soomaalidu waa dad qaasatan dhibaato haysato, Soomaalida waxaa lagu sameeyaa cunsuriyad labo jibaar ah maadaama ay Madoow Yihiin, Afrikaan Yihiin isla markaana ay Muslimiin yihiin”.

Hadaba yaa la saari karaa eeda sawirka qaldan ee Soomaalida laga muujiyo. Ma cunsuriyada mise fashilka Soomaalida?