Dhawr boqol oo qof oo reer Malmö ah ayaa galabta isugu soo baxay afaafka hore ee xarunta dawladda hoose, waxaana ay muddo hal daqiiqo ah aamusnaayeen, si ay u xusuustaan ​​labadii qof ee ku dhintay weerarkii dugsiga ee Malmö oo uu arday ku dilay fiidnimadii Isniinta.

Catherine Stegerenfeldt oo ah maayarka golaha deegaanka ayaa hadal kooban oo ay u jeedisay macalimiinta dugsiga, ardayda iyo qoysaskooda.

Iyada oo ku sifaysay wixii shalay dhacay fal waxashnimo ah, waxa ay tidhi, “Aad baan uga xumahay…Fikirkayga iyo dareenkaygu waxa uu la jiraa dhibanayaasha, eheladooda, shaqaalaha iyo ardayda dugsiga.

Maayarka ayaa khudbad u jeediyay ardaydii wax ka baranaysay dugsiga la bartilmaameedsaday, wuxuuna ku nuux-nuux saday inay jirto taageero loo fidiyo oo ay tahay in la helo, isagoo xusay in haddii ay wax tabanayaan aanay ka waaban in la caawiyo.

Isagoo ka jawaabaya su’aal uu TV-ga Sweden ka weydiiyey sida ay ardaydu ugu soo laaban karaan dugsiga kadib wixii halkaasi ka dhacay? “Waa xaalad naxdin leh, waana sababta aan u siino taageerada ardayda halkaas joogi doonta ilaa inta ay u baahan yihiin,” ayay tiri Catherine Sternfeldt