Dowladda Iswiidhan ayaa boggeeda rasmiga ah ku shaacisay inay wax ka beddeshay hawshii horumarinta imtixaanka luuqadda Iswiidhishka ee looga baahan yahay helitaanka jinsiyadda, iyadoo la kordhiyay muddada loogu talagalay diyaarinta iyo hirgelinta imtixaanka.
Sanadkii hore ayay dowladda u xilsaartay Golaha Jaamacadaha iyo Kulliyadaha (UHR) inay sameeyaan daraasad hordhac ah oo ku saabsan diyaarinta imtixaan jinsiyadeed oo la xiriira luuqadda Iswiidhishka iyo waxbarashada muwaadinnimada. Hawshan waxaa iska kaashaday Jaamacadaha Göteborg iyo Stockholm.
Jaamacadda Stockholm oo Codsatay Waqti Dheeraad ah
Jaamacadda Stockholm ayaa sheegtay inaysan awoodin inay diyaarsato imtixaanka luuqadda Iswiidhishka muddadii hore loo cayimay. Warbixintii Golaha Jaamacadaha iyo Kulliyadaha (UHR) uu u gudbiyay dowladda bishii Sebtembar 2025, ayaa lagu xusay in diyaarinta imtixaan lagu cabbirayo xirfadaha akhriska iyo fahamka maqalka ee luuqadda Iswiidhishka ay u baahan tahay waqti dheer.
