Xisbiga Dimoqraadiga Bulshada ee Iswiidhan ayaa ku dhawaaqay inuu beddelay mowqifkiisii ku saabsanaa waxa loo yaqaan “masaafurinta dhallinyarada”, isagoo ka dalbanaya dowladda in si degdeg ah loo joojiyo masaafurintaas ilaa laga caddeeyo xaaladda sharciga iyo in la helo hannaan gaar ah oo nidaamka ka mid ah.

Afhayeenka siyaasadda socdaalka ee xisbiga, Ida Karkiainen, ayaa u sheegtay wargeyska Dagens Nyheter:

“Waxaan dalbaneynaa in si degdeg ah loo joojiyo masaafurintan ilaa ay dowladda caddeyso sida ay damacsan tahay inay ula tacaasho arrintan.”

Arrintan waxay khusaystaa dhallinyaro ku soo barbaaray Iswiidhan tan iyo carruurnimadoodii, balse wajahaya khatar masaafurin marka ay gaaraan da’da 18 sano.

Tani waxay timid kaddib markii ay dowladda meesha ka saartay suurtagalnimadii in la siiyo ruqsad deganaansho sababo bani’aadamnimo oo “si gaar ah u xasaasi ah”, taas oo horey loo isticmaali jiray marka la cusbooneysiinayo deganaanshaha ku-meel-gaarka ah.