Miisaanka dheeriga ah iyo cayilka ayaa noqodey dhibaato ku soo kordheeysa haweenka uurka leh ee reer Sweden, middaasina oo halis ku ah ilmaha uurka lagu sido. Iyada oo dhanka kale caqabaddaa ku kala duwan yihiin gobollada dalku.
Kor ayey u kaceyaan tirada haweenka uurka leh ee cayilan ama cayilka dheeriga ah uu saaran yahay. Sannadkii 2017 ayey afar dalool mid uu haweenka uurka leh saarnaa cayil dheeri ah, halka toddoba dalool mid ay aad u cayilnayd.
Farqiga u dhexeeya gobollada ayaa aad u sarreeyay sida ku cad tirakoobkii hay’ad goboleedka caafimaadka. Gobollada Dalarna iyo Södermanland ayey haweenka uurka leh ee ku dhaqan ey bar ahaayeen kuwo uu saaran yahay culeeys dheeri ah ama cayil xad dhaaf ah kolkii ey iska diiwaan gelineyeen xarunta caafimaadka ee daryeelka hooyooyinka, halka gobolka Stockholm ay tiradaasi gaarsiisnayd saddex daloolow mid.
“Waa mid laga welwelo iney tiradaasi kor u sii kaceeyso, maadaama kor u kaca IBM (-xiriirka ka dhexeeya culeeyska iyo dhererka qofka qaan gaarka ah) uu halis ku noqon karo caafimaadka hooyada iyo dhallaankaba. Sidaa daraadeed ayaa loogu baahan yahay in laga hadlo dhibaatadan xasaasiga ah ka hadalkeeda iyo in bulshada laga dhex sameeyo howlo looga hortegeyo. Sidoo kale waxaa loo baahan yahay in goobaha caafimaadka hooyooyinka uurka leh ey ka caawiyaan muddada ey uurka leeyihiin”, sida ay qoraal saxaafadeed ku sheegtay Anna Sandström, ahna dhakhtarad ka howlgasha machadka jaamicadda Karolinska.
Da’da ey habluhu ku dhallaan:
Isku celcelin waxey habluhu ku dhalaan ilmahooda ugu horreeya da’da 28,7 sannadood. Isku celcelin da’dii ugu waynayd ee habluhu ku dhallaan carruurta ugu horreeya ayuu u sitay gobolka Stockholm sannadkii 2017, middaasina oo ahayd 30,3 sannadood. Halka ay isku celcelin da’dii ugu hooseeysay ee habluhu ku dhalaan ilmahooda ugu horreeya ahaayeen gobollada Gävleborg iyo Kalmar 27,3 sannadood.
Tirakoobka wuxuu sidoo kale muujiyay inay sarreeysay tirada haweenka lagu soo jeexo ilmaha, 17,3 boqolkiiba.
Somaliska Stockholm
Xigasho/TT
