Lixdii bilood ee Sannadka ugu horreeyey ayey 16 qof oo soomaaliya ka soo jeeda oo tarxiil uu ku dhacay ey si iskood ah uga codsadeen ciidanka xuduudaha Sweden, in gacan laga siiyo sidii ey dib ugu laaban lahaayeen dalkoodii hooyo.
-Way adag tahay runtii in la saadaaliyo, sida ay sheegtay.
Inkasta oo ey diiwaanka ciidanka xuduudaha ku jiraan 1459 muwaadin soomaali ah oo la go’aamiyey iney dalka isaga baxaan, ayey saddexdii sannadood ee ugu dambeeyey 2016-2018 isku celcelin gacan looga siiyey si ey dalkoodii hooyo dib ugu laabtaan qiyaastii 22 qof sannadkiiba. Waa tiro aad u hooseeysa oo ey ugu wacan tahay inaan sida xeerka dalkani qorayo aan khasab dalkoodii loogu celin karin muwaadiniinta soomaalida, sida ay sheegtay Natalya Carlsson.
– Iminkadan la joogo, soomaalida jajuub looguma tarxiilo dalkoodii, sida ay hadalka u dhigtay. Iyadoo hadalkeedii sii wadatana sheegtay inuu go’aankaasi ugu wacan yahay laba arrimmood. Waa mide xeerka dalka ka jira iminka oo qoraya inaan wadammo ay soomaaliya ka mid tahay khasab loogu qaadi karin tarxiil iyo in maamulka dawladda Soomaaliya aanu diyaar u ahayn inuu qaabilo muwaadiniin soomaali ah oo dib loogu soo tarxiilo haddii aaney raali iyagu ka ahyn, sida ay sheegtay.
-Hayadaha soomaalida ayaa shruud ka dhigay in qofku uu marka hore raali ka yahay in Soomaaliya dib loogu celiyo.
Si hadaba qofka mutadawac ah gacan looga siiyo in Soomaaliya dib loogu celiyo ayuu marka hore u baahan rabitaanka ka sokow inuu la yimaado dokument noocuu doonaba ha ahaadee caddeeynaya inuu u dhashay Soomaaliya. Waxaa haddaba la is weydiin karaa, maadaama aanu dalka Sweden aqoonsaneyn wax dokument ah oo Soomaaliya ka soo baxay, siday haddana ugu xiri kartaa in lala yimaado dokumen aqoonsi ah si dalkii loogu celiyo. Natalya Carlsson ayaa middaa kaga jawaabtay in loo baahan yahay kow sidii xiriir loola sameeyn lahaa hayadaha soomaaliya oo loo wargelin lahaa iyo midda labaad oo ah.
-Cidda aan aqoonsanayn waa annaga (iswiidhishka), balse hayadaha soomaalidu wey aqoonsan yihiin dokumentigooda sida ay hadalka u dhigtay.
Diiwaanka ciidanka xuduudaha ee tarxiilka ayey dadku ku galaan saddex siyaabood: Qof waayey deggenaansho oo hayadda socdaalku soo gudbiso. Qof ay maxkamaddu ku riday xukun iyo tarxiil iyo qof ciidanka ammaanku gacanta ku dhigeen oo aan dalka sharcidarro ku jooga.
Maadaama aannu xeerku qorayn in jajuub soomaalida dib loogu tarxiilo dalkoodii ayey dhanka kale dadyoowga dembiyada gala oo uu ku dhaco xukun iyo tarxiil sidoo kale aan jajuub soomaaliya loogu celin karin kolka uu xabsiga soo dhameeysto. Hase yeeshee uu shakhsigaasi kaga duwan yahay in gacanta lagu sii hayn karo, sida ay sheegtay Natalya Carlsson.
-Waxaa markaa suurtagal ah in qofkaasi ruumaanka (xabsiga) lagu sii hayo, sida uu qorayo xeerka socdaalku marka uu xukunkiisii soo dhammeeysto. Waxaana lagu hayn karaa illaa wakhti aan cayinayn, sida ay sheegtay Natalya Carlsson, ahna sarkaalad ka tirsan ciidanka xudduudaha laanta Noa.
Somaliska Stockholm
Xigasho/radiosverige
