Laga bilaabo xilliga kuleeylaha ee sannadka 2020 ayaanay suurtagal u noqon doonin qaxootiga dalkan yimaada iney xaq u yeeshaan gunnada nolol maalmeedka, haddii ey iskood u deggaan hooy ku yaala xaafadaha danyartu ku badan tahay.
Qorshahan ayaa ka mid ah heshiisyadii dawladda lagu soo dhisay oo ey wadjirka u gaareen xisbiyada S, MP, C iyo L.
– Midda aannu ka hortageeyno waxay tahay xaafadaha ey ka jiraan dhibaatooyinka badan iyo ciriiriga, si degmooyinka loogu suurtageliyo iney howlahooda qorsheeyn karaan, sida uu sheegay wasiirka shuruucda Sweden Morgan Johansson.
Sida uu xaaerku maanta yahay ayuu soo galootigu xaq u leeyahay inuu kala doorto in deegaan laga siiyo xeryaha qaxootiga, ama ay deegaan ka dhigato goob ay soo qorsheeysatay, waxa loo yaqaanno EBO. Hase yeeshee laga bilaabo kuleeylaha sannadka foodda innagu soo haya ee 2020 ciddii deegaan ay soo heshay ka dhigata xaafadaha danyarta ee dhibaatooyinku ku badan yihiin laga jaran doonaa gunnada nolol maalmeedka ee wakaaladda socdaalku bixiso. Waa gunnada 71 koron/maalintii ee la siiyo qaxootiga kelinimada u nool, halka qooyska ka kooban laba waalid iyo laba carruur ah ey ka dhigan tahay 6 000 oo koron bishii oo laga jaran doono, sida uu sheegay Morgan Johansson.
– Tallaabadan waxay dhiiri gelin u noqoneeysaa in lagu nagaado xeryaha qaxootiga muddada jawaabta sharciga la sugayo oo kolka la helo lagu meeleeyneyo degmo, sida uu sheegay.
32 degmo ayuu saameeyn doonaa wax ka bedelka xeerkan. Waana degmooyin ay dawladdu horay u calaamadeeysay oo dhammaantood ey ku yaalaan xaafado danyartu ku badan tahay oo ey ka jiraan dhibaatooyin. Xaafadaha ey degmooyinkaasi ku yaalaan ayey ka mid yihiin Stockholm, Göteborg, Malmö iyo Uppsala.
Sida uu sheegay wasiirka shuruucda Morgan Johansson iney degmooyinka laftoodu ku soo war gelin doonaan goobaha ey ka jiraan shaqa la’aanta ba’an iyo ciriiriga hooyga ee aan gunno maalmeed lagu siin doonin magan gelyodoonka doorta inuu nawaaxigaa ku noolaado ama uu hooy ka dhigto.
Doodda la xiriirta xorriyadda deegaanka ee soo galootiga ayaa in muddo ahba socotay, iyadoona uu xisbiga Vänsterpartiet yahay xisbiga keliya ee xubnaha ku leh baarlamanka ee ka soo horjeeda in la xaddido xorriyadda doorashada deegaanka ee magangelyo doonka.
Christina Höj Larsen, af hayeenka siyaasadda socdaalka ee xisbiga V ayaa aaminsan in aau is bedelkani yeelan doonin saameeyntii looga gol lahaa.
– Waxay ila tahay in dadku dooran doonaan inay la noolaadaan cid ey garaneyaan iyo shabakadda asxaabtooda, hase yeeshee ey ka dhaqaale liidan doonaan mar haddii laga jaro gunnadii nolol maalmeedka, sida ay sheegtay Christina Höj Larsen.
Somaliska Stockholm
Xigasho/radiosverige
