Sidii shalay aan soo qornay dowlada Sweden ayaa isbedalo waaweyn ku samaynaysa sharciga socdaalka. Akhristayaasha qaar ayaa u muuqda kuwo ciwaanka keliya akhrista ee aan gudaha u galin mowduuca, marka waxaan halkaan ku faahfaahinayaa qodobada ay dowladu wax ka badalayaan iyo sida ay Soomaalida u saameynayaan.
Dadka qaar ayaa soo qoray in aan anigu Soomaalida ka soo horjeeda oo aan magaca Soomaalida markasta soo qoro balse waxay hilmaameen in websitekaan uu u furanyahay Soomaalida, oo haddii laga hadlo qaxootiga oo dhan in aniga muhiimada iyo fikirka aan siinayo sida Soomaalida ay arimahaas u quseeyaan, balse muhiimadu ma ahan in Soomaalida la xumaynayo ama laga soo horjeedo. Boqorka gabar u dhalatay iwm anaga nama quseeyaan, mise wararka nuucaas ah ayaad doonaysaan???
Hadaba sharciga cusub sidee u saameynayaa Soomaalida.
- Sharciyada ku meel gaarka ah ee la bixinayo (Tidsbegränsade uppehållstillstånd) isbedalaan ayaa saameynaya dhamaan soo galootiga. Dadka laga soo qaado xeryaha qaxootiga iyo familada caruurta leh ee isdhiibay ka hor maanta ayuusan sharcigaan qaban doonin. Dhamaan dadka kale ayuu qabanayaa sharcigaan oo ay Soomaalidu ku jiraan.
- Mideynta qoysaska oo la xadidayo (Begränsad anhöriginvandring) qodobkaan ayaa saameynta ugu weyn ku yeelan doona Soomaalida. Sababta ayaa ah in qaar badan oo Soomaalida sharciga Sweden haysata lagu siiyay sharciga qodobka lagu magacaabo (alternativt skyddsbehövande) oo ah dadka kale ee Magangalyada u baahan, dadkaas ayaan lala mideyn doonin reerkooda. Qofka la siiyo degenaanshaha ku meel gaarka ah ayaan lala mideyn doonin qoyskiisa. Dadka haysta aqoonsiga qaxootiga ee Geneva ayuusan sharcigaan qaban doonin.
- Shuruuda biilka oo la adkaynayo (Skärpta försörjningskrav) isbedalkaan ayaa qabanaya dhamaan dadka doonaya in lala mideeyo qoyskooda, marka laga reebo qofkii dalbada in reerkiisa lala mideeyo sadexda bilood ee ugu horeysa marka uu sharciga qaato kaaasoo ah Geneva. Qofka keenaya qof kale Sweden ayay waajib noqon doontaa in uu biili karo.
- Qodobka Dadka kale ee Magangalyada u baahan (Övriga skyddsbehövande har inte rätt till uppehållstillstånd) oo aan sharci la siin doonin. Qodobkaan ayaa qaasatan Soomaalida si weyn u taabanaya maadaama sidii aan horey u sooo sheegay Soomaali badan sharciga lagu siin jiray qodobkaan iyo qodobka kale ee ah qof dhibaato qaas ah ay haysato (Synnerligen eller särskilt ömmande omständigheter). Tusaale ahaan dadka wadankooda uga soo cararay dagaalada ayaa qodobodaan sharciga lagu siin jiray.
Intaa waxaa dheer in dadka caruurta isku dhiiba ayaa caafimaad ahaan loo baari doonaa da’dooda, arintaas ayaa dood ka taagantahay iyadoo dadka qaar ay leeyihiin qofka da’diisa saxda ah ayay sheegi kartaa halka qaar kale leeyihiin Maya.
Waxay kale oo dowladu soo roggi doontaa in dhamaan gaadiidka dadweynaha ee soo gala Sweden, sida tareenada, maraakiibta, diyaaradaha iyo basaska ay waajib ku noqon doonto in ay dadka aqoonsi weydiiyaan inta aysan Sweden soo galin.
Sharciyada cusub ayaa dhaqan-galaya bisha April 2016.
Waxaan rajaynayaa in taasi ay faahfaahin idin ku filantahay.
