Gabadha lagu magacaabo Sümeyya Gencoglu oo 22 sano jir ah ayaa isbuucii tagay waxaa loo doortay in ay ka mid noqoto madaxda ugu saraysa xisbiga Miljöpartiet (MP). Goloha maamulka xisbiga oo loo yaqaan (partistyrelsen) ayaa masuul ka ah hogaanka xisbiga Miljöpartiet iyadoo ay Sumeyya noqonayso qofkii ugu horeeyay ee Muslim ah ee da’yar ee xilkaasi loo doorto. Sumeyya oo ku nool magaalada Halmstad ayaa waxay siyaasada ku jidhay muddo 5 sano ah.
“Aad ayaa ugu faraxsanahay waana sharaf in la i doortay. Waa mid xiiso badan in aan ka qeyb qaato samaynta siyaasada xisbiga inaga oo ka tirsan xulufada dowlada” ayay Sumeyya u sheegtay telefishinka SVT.
Sumeyya ayaa hada barata cilmiga Bulshada. Waxay sidoo kale gudoomiye u tahay urur lagu magacaabo Muslimiinta u taagan Nabada iyo Cadaalada (Svenska muslimer för fred och rättvisa) qaybtiisa magaalada Halmstad. Waxay sheegtay in ay ka shaqayn doonto arimaha sinaanshaha, socdaalka iyo waxbashada. Iyo in ay ka qeyb galiso siyaasada dhalinyada iyo dadka soo galootiga ah.
Hambalyo ayaan leenahay Sumeyya!
