Foorno ku taala koonfurta Sweden ayaa waxaa la soo daristay fadeexad ku saabsan macmacaan ay sameeyeen iyadoo dadka qaar ay ka eedsheegteen in ay yihiin cunsuriyiin. Milkiilayaasha foornada ayaa sheegay in aysan wax cunsuriyad ah ka wadin macmacaanka ee ay doonayeen in ay muujiyaan midabka shukulaatada.
Inkastoo midadka macmacaanka uu yahay dhowr nuuc oo kala ah madoow, baroown iyo cadaan ayaa waxaa dooda dhaliyay kan madoow oo keliya. Afhayeenka ururka dadka Afrikaanka ah ee Sweden (Afrosvenskarnas riksförbund) Kitimbwa Sabuni ayaa sheegay in ay iska cadahay cunsuriyada macmacaanka isagoo sheegay in ay qeyb ka tahay cunsuriyada dadka cad ee Sweden ay ku sameeyaan dadka madoow.
Hadaba su’aashu waxay tahay waa maxay sababta ay cunsuriga ku noqdeen macmacaankaan? Su’aashaas ayuusan si cad uga jawaabin Kitimbwa Sabuni. Qaar kale oo ka mid ah dadka madoow ayaa qilaafsan fikradiisa oo aaminsan in aysan cunsuriyad la taaban karo ka muuqan meeshaan.
Anigu qaasatan waxaan aaminsanahay in aysan cunsuri ahayn macmacaankaan isla markaana ay indhaha ka leexinayso cunsuriyada dhabta ah ee ka jirta Sweden. Haddii aan waxkasta cunsuri ku tilmaamno taasi waxay keenaysaa in naloo arko kuwo aan si dhab ah u hadlayn isla markaana doonaya ka dhex muuqashada saxaafada oo keliya.
Adiga sidoo kale kula tahay? Fikradaada ku darso…
