Axadii ayaa magaalada Helsingborg waxaa lagu qabtay wiil dhalinyaro Soomaali ah oo da’diisa lagu sheegay 19-sano jir kaasoo khaat fara badan uu baabuurka uga buuxay. Booliska ayaa sheegay in markii wiilkaan uu soo galay xuduuda la waydiiyay in uu wado wax alaab ah isaga oo sheegay in aysan waxba gaariga u saarnayn.
Markii baaritaan lagu sameeyay ayaa laga helay gaarigiisa kartoomo ay ka buuxaan Khaat gaaraya 210 kg taasoo ah tirada xabsiga lagu galo. Torbjörn Persson oo ka tirsan Hay’ada Tullverket ayaa sheegay in wiilkaan laga yaabo in uu muteysto 1 sano iyo bar xabsi ah.
Ma ahan markii ugu horeysay ee Soomaali lagu qabto iyaga oo isku dayaya in ay Khaat soo galiyaan Sweden. Khaatka ayaa wadankaan sharci daro ka ah, sida inta badan wadamada kale ee Yurub.
