Laanta Socdaalka oo sharaxday caqabadaha hortaagan mideynta qaar ka mid ah qoysaska Soomaalida

22
SHARE

Sida qaar ka mid akhristayaasha aad la socotaan shalay waxaa Stockholm ka dhacay kulan ay ka soo qeyb galeen labo ka midMigrationsverket ah shaqaalaha Laanta Socdaalka Sweden (Migrationsverket) oo ku taqasusay arimaha mideynta qoysaska iyo cadaalada. Kulaankaan oo ay soo qabanqaabiyeen Lena Rösell oo ka tirsan ururka Socialamissionen iyo qaar ka mid ah Soomaalida dhibaatadu ka haysato mideynta qoysaska ayaa lagu lafa guray arimo badan oo la xiriira mowduucaan.

Shaqaalaha Laanta Socdaalka oo kala ahaa labo gabdhood oo lagu kala magacaabo Theresa Karlbjörn oo ah qabiir xaga arimaha mideynta qoysaska iyo dib u dejinta kana shaqaysa xafiiska Malmö iyo Sara Arya oo ka shaqaysa waaxda cadaalada ee xafiiska Norrköping ayaa faahfaahin ka bixiyay sababaha loo diiday qaar ka mid ah Soomaalida.

Theresa Karlbjörn ayaa sharaxday in Laanta Socdaalka aysan haysan sharci waadix ah oo la xiriira mideynta reeraha aan aqoonsigooda cadayn balse iyagu ay isticmaaleen go’aankii maxkamada sare ee ku saabsanaa mideynta reer horay u dhisnaa oo wadanka Iran ka soo jeeday. Waxay sheegtay in ay asxaan u sameeyeen Soomaalida oo ay runtii aad ugu dadaaleen maadaama uusan jirin sharci ka soo baxay baarlamaanka. Waxay sheegtay in ay si naxariis ah u fasireen go’aankii maxkamada sare balse ay go’aamiyeen in reeraha la mideynayo ay yihiin kuwo hore u dhisnaa (wadankoodii ku wada noolaa mudo). Sababta ka dambaysa arintaas ayay sheegtay in ay tahay in uu jiro sharci quseeya mideynta reeraha cusub oo dadka o dhan qabanay kaasoo ah in haddii qof uu mardhow soo guursado ay waajib tahay in ay baasaboor leeyihiin isla markaana si loo hubiyo in guurkooda uu yahay mid dhab ah la siiyo qofkaas sharci ku meel gaar ah.

Waxay sheegtay in maadaama Soomaalidu aysan lahayn baasaboor aan sharci ku meel gaar ah la siin karin, sidaa darteedna aysan cadayn karin aqoonsigooda xitaa haddii ay caruur meesha ku jirto. Waxaa dhacda in haddii reerka guurkooda uu yahay mid aan horay u dhisnayn (oo ka yar 2 sano) isla markaana ay caruur haystaan in Laanta Socdaalka ay caruurta siinayo deganaansho rasmi ah maadaama caruurtu markasta ay leeyihiin xuquuq in lala mideeyo waalidkood oo ku nool Sweden balse hooyada laga soo tagayo maadama aysan cadayn karin aqoonsigeeda. Hooyada ama aabaha ayaa markii laga soo qaadayo caruurta waxaa laga saxiixayaa in ay bixiyaan ogolaasho in caruurta lala mideeyo waalidka kale ee ku nool Sweden, saxiixaas ayaa keenaya in mustaqbalka xitaa aadan dalban karin in caruurta laguu soo celiyo ama xitaa adiga lagula mideeyo.  Arintaas ayay Theresa Karlbjörn ku tilmaamtay mid xanuun badan oo aysan xitaa iyada fahmi karin sababta ka dambaysa balse uu sharcigu sidaas yahay. Dhowr ayay muujiyeen in aysan jawaab u ahayn sababaha lagu haysto Soomaalida isla markaana ay laftooda ka danqanayaan dhibaatooyinka haysta qaar ka mid ah reeraha Soomaalida.

Waxay cadeeyeen in shaqaalaha Laanta Socdaalku ay yihiin bani’aadam qaladaad sameeya oo tusaale ay u tahay in markii hore ay sheegeen in Soomaali 20.000 gaaraysa la mideyn doono taasoo beenowday. Waxay kale oo balan qaadeen in arinta shuruuda reerka hore u dhisnaa ay wadahadal ka samaynayaan gudaha Laanta Socdaalka oo qaasatan ay doonayaan in maadaama qaar ka mid ah dadka lagu xiray shuruuda labo sano ama reer hore dhisnaa ay haystaan dhowr caruur ah la eego dhinaca caruurta oo taas loo isticmaalo cadayn ah in guurka reerkaan uu yahay mid dhab ah.

Arinta la xiriirta in reerku uu labo sano horay u wadana noolaa ayay sheegtay in aysan guud ahaan jirin sharci sheegaya tirada labo sano balse ay muhiimadu tahay in reerku hore u dhisnaa oo wadankoodii ay labada lamaane ku wada noolaayeen iyadoo ay qaar ka mid ah shaqaalaha Laanta Socdaalku u fasirtaan in labo sano shuruudu tahay. Waxay sheegeen in sidoo kale uu hada socdo qorshe lagu cadaynayo in shuruudu tahay LABO SANO oo sharci laga dhigi doono.

Xalka arinta Soomaalida ayay sheegtay in uu yahay mid siyaasadeed oo baarlamaanka iyo dowlada Sweden ay u taalo ama in maxkamada sare (Migrationsöverdomstolen) ay go’aan cusub ka soo saarto, kaasoo ay sheegtay in uusan fududeyn. Waxay talo u soo jeediyeen in Soomaalidu ay isabaabulaan oo ay muujiyaan dhibaatada haysata. Waxay sheegeen in ay ururada Soomaalida iyo siyaasiyiinta baarlamaanka ugu jirta ay arimahaan u doodaan oo saxaafada laga dhex muuqdo isla markaana la sameeyo mudaharaadyo iwm. Xalka kale ayaa ah haddii ay Sweden aqoonsato baasaboorka Somalia oo markaas qofkii dalbanaya reerkiisa oo shuruuda labo sano qabanayso ay isticmaali karaan baasaboorka sidaas darteedna lagu siiyo sharci ku meel gaar ah. Balse taas ayaan hada muuqan maadaam aysan Sweden si rasmi ah u aqoonsan dowlada Somalia iyo aqoonsiyada ay bixiso.

Ugu dambeyntii ayaa xubnihii Soomaalida ee meesha isugu yimid waxay isku raaceen in ay midoobaan oo ay sameystaan urur ay ku mideysan yihiin oo u dooda xuquuqdooda isla markaana ka shaqeeya danahooda. Waxaa laysku raacay in la sameeyo abaabul wadanka oo dhan ah oo xiriir iyo midnimo sameeyaan dadka ay quseyso arimahaan. Wixii faahfaahin ah ee ku saabsan samayska ururkaas ayaa waxaa lagala xiriiri karaa RUUN oo laga heli karo telefoonka: 07 35 65 74 38.

 

SHARE

LEAVE A REPLY

Please enter your comment!
Please enter your name here