Kulan dhexmaray Laanta Socdaalka & Dalada udooda mideynta reeraha

14
SHARE

Talaadadii la soo dhaafay ee taariikhdu ahayd 2 bisha Augusti ayaa waxaa kulan dhex maray xubno ka tirsan dalada u dooda mideynta reeraha Soomaalida oo ay matalayeen labo xubnood oo ka socota ururka FARR ee u dooda soo galootiga iyo gabadh ka socotay ururka midnimada Soomaalida SRFS, iyagoo la kulmay wakiilka Laanta Socdaalka u qaabilsan xaga sharciga Mikael Ribbenvik.

Kulanka ayaa looga wada hadlay arimo quseeya  mideynta reeraha Soomaalida iyo halka wax marayaan iyadoo xubnihii ka qeyb galay kulanka ay suaalo muhiim ah u bandhigeen wakiilka Laanta Socdaalka. Ribbenvik ayaa xubnaha u sheegay in ay wadahal kala sameeyeen wasaarada cadaalada arimaha quseeya Soomaalida. Xubnaha ayaa suaalaha hoos ku qoran waydiiyay Mikael Ribbenvik.

Sidee ayay Laanta Socdaalka ugu bandhigtay dowlada in wax laga  badalo shuruuda aqoonsiga?

Ribbenvik: Laanta Socdaalka waxay dowlada kula xiriirtaa bil bil, dhowr jeer ayaa laanta Socdaalka u bandhigtay dowlada in loo baahanyahay in isbedal la sameeyo arintuna ay tahay mid siyaasadeen. Markii ugu horeeysay ee aan taas sameyney waxay ahayd bishii Febraayo ee sanadkii 2010 markii aan ogaanay in sida wax u socdaan aysan ahayn mid haboon. Hadana waxaan soo bandhignay bishii Augusti iyadoo aan ka hadalnay dhibaatada Soomaalida. Waxaan ku tala jirnaa in aan dowlada markale u qorno, haddii aad talooyin haysaan waa soo dhaweynayaa.

Sidee ayaa sharciga loo badali karaa, mise kala hadasheen midaa dowlada?

Ribbenvik: Arinta cadeynta aqoonsigu waxay leedahay labo waji. Mida koowaad, waa xakameynta soo galootiga oo muhiim u ah Sweden taasoo ka hortagi karta argagixisada, ka ganacsiga dadka iyo dambiyada. Mida kalena, waa mideynta reeraha. Laanta Socdaalka uma taalo in ay isku miisaanto labadaan arimood. Midaasi waa arin siyaasadeed oo u baahan go’aan siyaasadeed. Waqti dheer ayaa Laanta Socdaalka waxay Soomaalida u sameysay isku dheelitir, taasoo aan ku saleysneyn go’aanada siyaasada. Taasina ma ahayn mid wanaagsan.

Waxaa kale oo laysku soo qaaday tusaale ahaan fikrada ah in caruurta yaryar degenaansho lagu siiyo iyaga oo laga qaadayo dheecaanka DNA balse midaas mid hufan ma ahan waayo waxaa jira caruur badan oo aan la socon waalidkoodii dhabta ah.

Sidee ayay Laanta Socdaalka u aragtaa xal ku meel gaar ah, maxaa loo baahanyahay, mise kala hadasheen dowlada?

Ribbenvik: Xal ku meel gaar ah ma aanan soo bandhigin, xaga dowladana kama aanan maqal cid ka hadleysa arintaas.

Laanta Socdaalku ma aaminsantahay xaalada hada in ay sharciga ka soo horjeedo, mise kala hadasheen arintaan dowlada?

Sharci ka soo horjeeda arinta waa mid u dhaxeysa maxkamadaha Socdaalka iyo maxkamada sare ee Socdaalka. Xitaa waxaa jira go’aamo ka soo baxay maxkamadaha Socdaalka oo qilaafsan go’aankii maxkamada Sare ee Socdaalka. Marka laga hadlayo xeerarka caalamiga ah ee sida CRC iyo xeerka mideynta reeraha ma cada sida loo fasirayo xeerarkaas. Balse laanta Socdaalka ma aragto wax xeerar ah oo la jabiyay.

Maxaa dhibaato ah oo laanta Socdaalka ay aragtaa in ay keeni karto nidaamkii hore ee Soomaalida lagu mideyn jiray? Ma kala hadasheen arintaas dowlada? Mise jirtaa dhibaatada ka ganacsiga dadka?

Ribbenvik: Cabsida argagixisada iyo Al-shabaab waa mid jirta , laakiin ma ahan mid Laanta Socdaalka wax ka garanayso oo waa arin u taala waaxyaha amaanka. Xaga ka ganacsiga dadka dhibaatooyinka ayaa ka imaan kara balse waa in lala tashadaa quburada. Laanta Socdaalku waxay ku lugleedahay dhinaca codsiga oo keliya sidaa darteed warbixin fiican kama hayno.

Hadaba kulankaas sidaas ayuu u dhacay, sida ka cad hadalka Mikael Ribbenvik wax cusub oo la taaban karo kama soo bixin Laanta Socdaalka bilihii ugu dambeeyay.

Sidee u aragtaa Fadlan Hoos ku reeb Fakarkaga Qodobkan

LEAVE A REPLY

Please enter your comment!
Please enter your name here